Голем инцидент го одбележа второлигашкото дерби меѓу Брегалница и Шкендија Арачиново, кое денеска се одигра во Штип и заврши без победник 1-1.

Тензичната атмосфера кулминираше во 66. минута, кога домаќините добија пенал кој успешно го реализираа за израмнување на резултатот.

Од таборот на гостите бурно реагираа на одлуката на судијата, по што на теренот настана вистински хаос.

Незадоволството од досудениот пенал предизвика жестоки протести кај фудбалерите на Шкендија Арачиново, а ситуацијата дополнително ескалираше кога на теренот влетаа и дел од членовите на раководството на клубот, кои претходно се наоѓаа на трибината меѓу гостинските навивачи.

Во инцидентот мораше да интервенира и полицијата за да спречи поголеми немири и физички пресметки. По прекинот кој траеше околу десет минути, судијата покажа неколку црвени картони. Исклучен беше тренерот на Брегалница, Влатко Костов, како и комесарот за безбедност на гостинскиот тим.

По смирувањето на тензиите, натпреварот продолжи и заврши со резултат 1-1, епилог што повеќе им одговараше на штипјани во битката за пласманот.

Пет месеци по седницата на собраниската Комисија, одржана по претставката на Здружението „16 Март 2025“, родителите на загинатите во трагичниот пожар во дискотеката „Пулс“ во Кочани сè уште бараат одговори и одговорност. На седницата, обележана со силни емоции, солзи и сведоштва за болката што ја живеат семејствата, тие јавно ги прашаа власта и опозицијата зошто, како што велат, биле изманипулирани.

Според родителите, и власта и опозицијата со различни изговори ја избегнуваат вистината со цел да се заштитат себеси и политичките структури.

Томче Стојанов, родител на едно од загинатите деца, за ТВ24 посочи дека институциите не покажале вистинска волја за расчистување на трагедијата.

„Прво отидоа на одмор… Гледаме дека сме изманипулирани. Од сè што беше кажано и ветено, ништо суштинско не излезе на виделина. На постојаната анкетна комисија ги изнесовме сите наши болки, неправди и пеколот низ кој поминуваме повеќе од една година, а сè уште нема никакви заклучоци. Не можат да се усогласат за трагедија што ја виде целиот свет. Кај нас се прави театар. Срам да им е и на власта и на опозицијата“, рече Стојанов.

Родителите повторуваат дека не бараат политички пресметки, туку правда и системски промени што ќе спречат вакви трагедии да се повторат. Велат дека секојдневно се соочуваат со нови разочарувања и чувство дека институциите намерно ја одолговлекуваат постапката.

„Намерното саботирање на нашата ситуација нè погодува и револтира. Нашите животи и онака се уништени, а со оваа неправда секој ден доживуваме нови уништувања“, вели Стојанов.

Кочани, според семејствата, повеќе не е истиот град по 16 март 2025 година. Пораката „Системот ни ги уби децата“ и понатаму одекнува низ улиците, а родителите нагласуваат дека нивните деца не заслужиле да загинат во услови на екстремно високи температури, предизвикани од, како што велат, корупција, негрижа и нефункционален систем.

„Овој пекол создаден од парите, митото и корупцијата го живееме секој ден. Некој им пресуди на нашите деца и им го одзеде основното право на живот. А сега сите се тргаат и велат дека не сносат одговорност. Што уште треба да се случи?“, прашува Стојанов.

Во меѓувреме, собраниските комисии поврзани со трагедијата остануваат без конкретен епилог. Постојаната анкетна комисија, со која претседава лидерот на Димитар Апасиев, сè уште нема усвоено заклучоци. Од Левица тврдат дека седниците не се закажуваат бидејќи ВМРО-ДПМНЕ не обезбедува кворум.

Во застој е и анкетната комисија што треба да расправа за пожарот во „Пулс“, модуларната болница во Тетово, како и автобуските несреќи кај Ласкарци и во Бугарија. Лидерите на ВМРО-ДПМНЕ и СДСМ, Христијан Мицкоски и Венко Филипче, изнесоа различни ставови околу функционирањето на комисијата.

Иако Филипче во неколку наврати најавуваше дека СДСМ „веднаш“ ќе предложи свои членови, засега, како што изјави, чека официјален допис од собранискиот спикер. Од друга страна, ВМРО-ДПМНЕ останува на ставот дека новата анкетна комисија не може да започне со работа без претходно да се усогласат заклучоците од комисијата предводена од Апасиев. Досега, свои членови и заменици предложи единствено Левица.

Извор: 24.mk

Жителите на скопската општина Аеродром се во страв по појавата на змија во непосредна близина на станбени објекти и простори каде што секојдневно си играат деца.

На социјалните мрежи и до нашата редакција 4NEWS.MK пристигна апел од загрижени граѓани кои бараат итна интервенција од општинските служби.

Според информациите од теренот, влекачот е забележан на улицата „Владимир Комаров“. Она што најмногу ги загрижува жителите е близината на детското игралиште, каде во попладневните часови фреквенцијата на луѓе и мали деца е најголема.

„Ги молам надлежните од општината да излезат на терен и да реагираат. Змијата се наоѓа пред зградата на број 27, изгледа како да е отровна, а во близина има детско игралиште. Стравот кај сите нас е огромен“, вели жителка на оваа населба во својот јавен апел.

Граѓаните бараат од Општина Аеродром и од претпријатијата задолжени за одржување на јавната хигиена и зеленилото да испратат екипи кои ќе го исчистат теренот и ќе дејствуваат превентивно. Со затоплувањето на времето, појавата на влекачи во урбаните средини станува се почеста, но нивната присутност во места наменети за деца бара итен одговор.

Експертите советуваат граѓаните да не се обидуваат сами да ја заловат или убијат змијата, бидејќи тоа може да предизвика агресивно однесување кај животното.

Македонија се подготвува за недела со релативно стабилни температури, но со зголемена облачност која ќе не придружува речиси во текот на целиот период. Според најновите метеоролошки податоци, не очекуваат топли денови, но со малку сонце.

Најтопло во понеделник и вторник

Почетокот на работната недела ќе донесе највисоки температури. Понеделник (11.05) ќе биде најтоплиот ден со максимални 28°C, иако небото ќе биде претежно облачно. Слична состојба не очекува и во вторник, кога термометарот ќе достигне до 27°C.

Пад на температурите од средината на неделата

Од среда (13.05) се очекува благ пад на дневните температури кои ќе се спуштат до 21°C. Во текот на четврток и петок температурите ќе се движат помеѓу 22°C и 23°C, проследени со константна облачност.

Свежи утра и сончеви периоди за викендот

Утринските температури во текот на неделата ќе бидат пријатни и ќе се движат помеѓу 10°C и 12°C, со исклучок на петок, кога се очекува најсвежото утро со само 9°C.

За вљубениците во сонцето, сабота (16.05) носи делумно разведрување. Иако облачноста ќе биде присутна, ќе има повеќе сончеви периоди со максимална температура од 22°C.

Преглед на температурите:

• Понеделник: 12°C / 28°C (Облачно)
• Среда: 12°C / 21°C (Облачно)
• Петок: 9°C / 22°C (Облачно)
• Сабота: 12°C / 22°C (Делумно сончево)

Под мотото „Чест за хероите, завет за иднината“, денеска во селото Туминец, Мала Преспа, беше оддадена почит на македонските борци од овој крај. Премиерот Христијан Мицкоски, кој е и ктитор на новото спомен-обележје, упати силна порака за единство на Македонците, нагласувајќи дека матицата цврсто стои зад својот народ во Албанија.

Македонците во Албанија – чувари на националното ткиво

На свеченоста организирана на брегот на Преспанското Езеро, во второто по големина населено место во областа Мала Преспа, премиерот Мицкоски истакна дека истрајноста на нашинците во овој крај е подвиг кој заслужува длабок поклон.

„Македонците во Албанија се нераскинлив дел од македонското национално ткиво. Вие го сочувавте македонското име, јазикот, традицијата и духот и тогаш кога било најтешко. Затоа денес сакам јасно да порачам: Матицата нема да ве заборави. Македонија стои со својот народ каде и да е – со почит, грижа и со искрена поддршка“, нагласи Мицкоски пред присутните граѓани.

Повик за обединување околу националните интереси

Во своето обраќање, премиерот стави посебен акцент на потребата од внатрешно обединување, влечејќи паралели со историската пожртвуваност на претците.

„На Македонија денес повеќе од сè ѝ е потребно обединување околу националните интереси и иднината на нашите деца. Нашите предци не се делеа кога ја бранеа слободата; не прашуваа кој од каде е, ниту на кого припаѓа. Сите стоеја под едно име – Македонија“, порача тој.

Траен завет во Туминец

Новиот споменик во Туминец останува како траен белег за придонесот на македонските херои од Преспанскиот крај во борбата за слобода и достоинство. Настанот во Мала Преспа помина во достоинствена атмосфера, со присуство на голем број Македонци од сите девет населени места во областа, кои уште еднаш ја потврдија својата цврста поврзаност со македонскиот идентитет.

Општина Штип презема итни мерки за заштита на образовните институции и јавните површини по неодамнешниот вандалски упад во основното училиште „Ванчо Прќе“. Покрај засилениот видео-надзор, градоначалникот Иван Јорданов најави поставување алармни системи и сеопфатна стратегија за превенција на девијантни појави.

Технички мерки: Аларми во училиштата и „око“ на секој агол

По уништувањето на паметни табли, компјутери и обидот за поплавување на катовите во најголемото штипско училиште, локалната самоуправа одлучи дополнително да го обезбеди образовниот процес.

„Видео-надзор веќе постои во сите институции, но со цел полесно идентификување и лоцирање на проблемите, воведуваме алармни системи кои ќе сигнализираат во реално време и ќе спречат повторување на инциденти како оној во ’Ванчо Прќе’“, изјави градоначалникот Јорданов.

Дополнително, градот ќе биде под засилен мониторинг со поставување на 190 нови безбедносни камери. Овие камери ќе бидат распоредени на клучни точки:

• Пред сите училишта и градинки;
• Низ централното градско подрачје;
• Во градските паркови и пред институциите.

Јорданов верува дека овие податоци ќе му бидат од голема помош на СВР-Штип за побрзо откривање и санкционирање на сторителите.

Едукацијата како клуч за промена

Општината не се потпира само на техничка заштита. За трајно решавање на проблемот со вандализмот, најавени се низа обуки и работилници во кои ќе бидат вклучени:

1. Родителите и наставниците: За подобро препознавање на ризичното однесување.
2. Учениците: Преку разговори со психолози и педагози за последиците од девијантното однесување врз нивната иднина.

„Целта е да се подигне свеста кај малолетниците за одговорно однесување и да се разбуди емпатија кон заедничкиот имот“, велат од локалната самоуправа.

Штетите се санирани

Од училиштето информираат дека штетите направени при упадот се веќе санирани и наставата се одвива непречено. Ова беше прв ваков случај на драстичен вандализам во штипското образование, што послужи како аларм за итна системска реакција на градот.

Во текот на изминатото деноноќие на целата територија на државата, полициските службеници лишија од слобода 10 возачи за безобѕирно управување возило, од кои шест возеле без дозвола (тројца малолетници), а по двајца со активна забрана и под дејство на алкохол.

Двајца возачи во Скопје (еден малолетник), и по еден во Тетово (малолетник), Гостивар, Велес (малолетник) и Делчево управувале возило без возачка дозвола. Возачот во Делчево учествувал и во сообраќајна незода со возилото кое го управувал, по што било констатирано дека е под дејство на алкохол, односно му биле измерени 1,89 промили алкохол во крвта. По еден возач во Скопје и Кичево управувале возило со активна забрана, а по еден возач во Скопје и Велес управувале возило под дејство на алкохол. По целосно документирање на случаите ќе бидат поднесени соодветни кривични пријави.

Апелираме до сите учесници во сообраќајот да ги почитуваат сообраќајните правила и прописи, да не управуваат возило без положен возачки испит или доколку имаат изречена мерка за забрана за управување или доколку се под дејство на алкохол и сите заеднички да придонесеме за побезбеден сообраќај.

Министерот за внатрешни работи Панче Тошковски денеска во Инџиково и Бутел положи свежо цвеќе на спомен-обележјата посветени на припадниците на македонската полиција кои ги загубија животите во терористичката акција во кумановско „Диво Насеље“ во мај 2015 година.

Во знак на почит кон нивната жртва, министерот Тошковски им оддаде почит на осумтемина македонски херои – Љубиша Аранѓеловиќ, Бобан Ивановиќ, Горан Илијевски, Жарко Кузмановски, Исамедин Османи, Сашо Самојловски, Ненад Серафимовски и Горан Стојменовиќ, кои животот го положија во одбрана на државата и безбедноста на граѓаните.

Тошковски истакна дека нивната храброст, пожртвуваност и љубов кон татковината остануваат траен симбол на чест и достоинство.

„Овој ден нè потсетува колку е висока цената на слободата, но и колку е силен македонскиот дух кога се брани државата. Наш долг е да се сеќаваме, да почитуваме и да ја чуваме вистината за нивната храброст.“, потенцираше министерот Тошковски.

Министерството за внатрешни работи и понатаму ќе продолжи достоинствено да ја негува културата на сеќавање и почит кон загинатите припадници на македонската полиција кои своите животи ги вградија во безбедноста и стабилноста на државата.

Драмскиот театар и КПУ Затвор Скопје потпишаа меморандум за соработка со цел отворање нови можности за ресоцијализација на осудените лица преку културата и уметноста.

Како што информираше Управата за извршување санкции, меморандумот го потпишале директорот на Драмски театар, Роберт Вељановски, и директорот на КПУ Затвор Скопје, Бобан Утковски.

Според институцијата, соработката има за цел преку театарски претстави и културни активности да придонесе за духовен развој, едукација и поттикнување позитивни вредности кај осудените лица.

„Културата, уметноста и театарот имаат моќ да допрат до секој човек, да разбудат емоции, совест, надеж и желба за позитивна промена“, наведуваат од Управата за извршување санкции.

Во рамки на соработката, на 8 мај дел од примерните осудени лица, во придружба на затворската полиција и вработени од секторот за ресоцијализација, присуствувале на театарска претстава.

Од КПУ Затвор Скопје посочуваат дека и во иднина ќе продолжат со активности насочени кон успешна ресоцијализација, враќање на довербата и создавање услови за подобра интеграција на осудените лица во општеството.

Македонија се подготвува за технолошки скок во железничкиот сообраќај, но најголемиот предизвик нема да биде изградбата на пругите, туку човечкиот кадар кој ќе управува со нив. Вицепремиерот и министер за транспорт, Александар Николоски, во интервјуто за „Ноќно студио“ на 4TV.mk, предупреди дека државата веднаш мора да започне со сериозна обука на машиновозачи и технички персонал.

Со најавата за брза железница која ќе развива брзина до 200 километри на час, Македонија влегува во групата на земји со висока технологија во транспортот, што бара сосема нов профил на работници во „Македонски железници“.

„Можеме да обезбедиме најмодерни возови и стабилно финансирање, но со тие возови некој треба да управува. Не можеме да позајмиме машиновозачи од Велика Британија. Затоа веќе сега, иако пругата ќе биде целосно оперативна до 2031 година, почнуваме со подготовки. Ни требаат сериозни луѓе кои ќе поминат низ ригорозни обуки за да можат безбедно да управуваат со возови на брзи пруги,“ истакна Николоски.

Министерот посочи дека во изминатите децении железницата била запоставена, што резултирало со одлив на стручен кадар, состојба која мора итно да се промени.

„Ако сега не ги искористиме овие пет-шест години за обука на нашите луѓе, ќе се доведеме во ситуација да имаме најмодерна пруга во Европа, а да нема кој да ја вози локомотивата. Мојот фокус е на периодот по ставањето на пругата во функција. Сакам македонски машинисти да ги возат возовите од Скопје до Солун и Атина. Тоа е патриотизам на дело – да ја изградиме државата и да им дадеме достоинствена и модерна работа на нашите граѓани,“ заклучи вицепремиерот.

Николоски најави дека во соработка со стратешките партнери ќе се организираат меѓународни обуки и сертификација за македонскиот железнички кадар, со што професијата машиновозач повторно ќе стане една од најпрестижните и најдобро платените во земјата.