Еден од лидерите на ВРЕДИ и градоначалник на Општина Чаир, Изет Меџити, денеска потврди дека поранешниот владин портпарол Мухамед Хоџа ќе ја преземе функцијата министер за екологија, додека актуелниот пратеник и поранешен министер за здравство, Беким Сали, ќе биде назначен за прв вицепремиер. Тој нагласи дека единствено останува да се утврди со кој дополнителен ресор ќе раководи Сали.
„Нема да има реконструкција, туку главно пополнување на испразнетите позиции. Процесот е во завршна фаза. Познато е дека Беким Сали ќе биде прв вицепремиер, а во наредните денови ќе се дефинира и кој ресор ќе го покрива. Министер за екологија ќе биде Мухамед Хоџа“, изјави Меџити.
На новинарско прашање дали министерот за здравство, Азир Алиу, ќе го замени Башким Бакиу, Меџити одговори дека сите детали околу можни промени во одредени министерства ќе бидат дополнително соопштени.
Меџити информираше и дека ВРЕДИ ќе настапи на локалните избори во општините Гостивар и Врапчиште, кои ќе се одржат на 11 јануари следната година, со нови кандидати за градоначалници.
