„Стабилен принос од 1 процент со вашиот почетен влог од 1000 евра, два сигнала дневно и парите потоа само легнуваат на Revolut“, гласеше пораката што ја добија бројни Хрвати, најмногу од Славонија, изминативе недели, по што решија да вложат.
Во целата приказна постоеше и една клучна информација – до заработените пари можете да дојдете дури по 52 дена. И навистина, многумина кои навреме влегле во оваа пирамидална шема преку платформата XUEX, во организација на извесна EG Investment Group, успеале да си ги повратат парите и да заработат повеќе од двојно, па денес не се во проблем.
Но, многу други кои биле дел од Telegram-групите преку кои комуницирале со платформата, синоќа сфатиле дека се измамени и дека останале без своите пари, пишува SiB.hr. Станува збор за, како што наведува порталот, илјадници луѓе.
Се уплаќало најмалку 1000 евра со услов да се инсталира апликацијата Xuex, да се отвори Telegram-сметка и лицето да има Revolut банкарска картичка. Членовите преку апликацијата секојдневно добивале два „сигнали“ кои морале да ги потврдат. Со секоја потврда, износот на нивната виртуелна сметка растел.
По колапсот, Leo Smith, еден од водителите на платформата, изјавил дека во Xuex влегла финансиска контрола и дека нивните проверки ќе траат околу десет месеци, при што до август следната година членовите нема да можат да дојдат до своите пари. Сите ги повикал до тогаш да се приклучат на неговиот нов финансиски проект, каде што на постојните членови на Xuex ќе им се подмирува 50% од вложените средства, пишува Вечерњи.
Предупредување на социјалните мрежи
За сето ова пред неколку дена на социјалните мрежи говореше математичарот Тони Милун, како и професорот од осечкиот ФЕРИТ Милјенко Шварцмајер, но од многумина наидоа на подбив со тврдење дека шемата е 100% исправна и дека нема измама.
„Измамите се сè почести, а еве уште една. Добив неколку прашања во врска со XEUX и ЕГ групата. Гарантираат удвојување на влогот за помалку од два месеца. На вакви нешта најчесто наседнуваат оние што не им веруваат ни на банките (па чуваат пари дома), ни на државата (не вложуваат во државни обврзници или записи), ниту во фондови (велат: сè тоа се измами).
„И тогаш одеднаш веруваат дека денес можат да вложат 1000 евра и за два месеца да повлечат 2000 евра. Тоа го прочитале во оглас на интернет или добиле порака од непознат што им се јавил преку Фејсбук. Луѓе, бидете внимателни. Не постои легално вложување што гарантира удвојување на добивката за неколку месеци“, напиша Милун.
Коментарите во најголем дел биле во стилот: „Јас сум во тоа некое време. Сè функционира без проблеми. Мислам дека за пишување за нешто треба малку повеќе информации. Конкретно, јас за два месеца од 1000 евра стигнав до 7000. Без проблем ги повлеков средствата. Никој не гарантира дека тоа ќе трае бесконечно, како што не трае ниедна инвестиција.“
Токму затоа испратил прашање до Полицијата во Осиек-Барања и Полицијата во Вуковар-Срем, дали ја истражуваат оваа шема и дали им се јавуваат оштетени граѓани.
Сè пукнало пред три дена
Инаку, целата шема изгледала прилично убедливо, но не и непознато во светот. Така, на пример, исто нешто неодамна било видено во Албанија, каде што исто така биле измамени илјадници луѓе. Оние што добивале пари во групата објавувале screenshot-и од своите добивки, награди во форма на плаќање сметки по ресторани и слично – сè со цел да се шири приказната за платформата која растела сè додека не пукнала.
„Беше убаво додека траеше, а знаевме дека нема да биде долго“, изјавил еден од членовите што успеал да заработи, додека други се тешат дека никој не ги терал на инвестиција која можела да биде од 1000 до најмногу 10.000 евра. За поголеми вложувања морало, за сè да изгледа поверодостојно, да се бараат специјални одобренија од организаторите.
„Вечерва пукна пирамидата наречена EG Invest/Xuex, во која за жал учествуваа илјадници Хрвати со просечно вложување од околу 1000 долари. Долго време предупредував на овој scam, но дури ни луѓе блиски до мене не сакаа да слушнат бидејќи беа уверени дека нашле сигурен начин за заработка. Ова е вежбана шема што се одвива во многу држави (на пример, во Индонезија се викаа Luex).
Овој тип на измама одамна е документиран, потекнува од Кина и се нарекува sha zhu pan, односно „колење свињи“. Следната фаза на оваа измама е – оштетените ќе почнат да ги контактираат „стручњаци“ кои за одреден надомест ќе им ветат поврат на изгубените пари. Ве молам, барем на оваа фаза не наседнувајте!“, напиша Шварцмајер на Фејсбук.
