Францускиот претседател Емануел Макрон денеска изјави дека е „веројатно“ учениците во средните училишта од следната година да им биде забрането користење мобилни телефони.
Оваа најава претставува проширување на веќе постоечката мерка која веќе важи за помладите ученици, пишува Politico.
Учениците во основните училишта и во пониските одделенија на средните училишта (collège) во Франција веќе имаат забрана за користење мобилни телефони.
Говорејќи на настан во источна Франција, Макрон оцени дека првата фаза на забраната функционирала „прилично добро“ и изрази поддршка за проширување на оваа политика и на повисоките одделенија на средните училишта (lycée), кои ги посетуваат ученици на возраст од 15 до 18 години.
Нов закон?
Францускиот претседател потврди дека министерот за образование, Едуар Џефре, веќе ја разгледува таа идеја. Сепак, воведувањето забрана во средните училишта би можело да бара донесување нов закон. Националното собрание ја усвои сегашната забрана во 2018 година, но тој закон јасно се однесува само на предучилишните установи, градинките, основните училишта и пониските одделенија на средните училишта.
Иако влијанието на Макрон врз домашната политика ослабнало откако во 2024 година го изгуби контролата над парламентот, претседателот во последните недели се обидува повторно да се наметне на домашната сцена. Со низа јавни настапи тој се обидува да покаже како се планира да се справи со предизвиците што ги носат социјалните мрежи и големите интернет-платформи.
