Нова количина од вакцините „Фајзер“ треба да пристигне во текот на денот, а голема количина (500 илјади вакцини) до крајот на неделава треба да пристигнат од „Синовак“.
Министерот Филипче најави дека со пола милион вакцини од „Синовак“ ќе бидат вакцинирани пријавени од сајтот vakcinacija.mk. Таму се пријавени 450 илјади граѓани.
До вчера во земјава беа аплицирани околу 450 илјади вакцини, а ревакцинирани над 180 илјади граѓани.
Вакцините кои Грција ги најави за Македонија, утре наутро се очекува да пристигнат во Скопје, дознава дописничката на МИА од Атина.
Информацијата на МИА од Атина ја потврдуваат и од Скопје, а како што и најавија пред две седмици и министерот Венко Филипче и портпаролката на грчката Влада Аристотелиа Пелони, од јужниот сосед ќе стигнат 20.000 дози од Астра Зенека.
На почетокот на месецов, Пелони одговарајќи на прашањето на дописничката на МИА од Атина на редовниот брифинг со новинарите, потврди дека Грција, во координација со Европската Комисија, ќе испрати по 20.000 дози од вакцините за Северна Македонија и Албанија, откако претходно, министерот за здравство Венко Филипче откри дека Северна Македонија очекува 70.000 дози од вакцините, од кои 50.000 од Бугарија и 20.000 од Грција.
Од Атина, денеска за Албанија беа испратени 20.000 вакцини Астра Зенека, а утре наутро ќе пристигнат и во Скопје.