Ковачевски: Нема поголем криминал од оние кои не сакаат Северна Македонија да биде дел од ЕУ

Јас од обврската за Европска унија не бегам, ниту смеам, ниту можам, ниту сакам и тоа го барам и од вас, рече премиерот Димитар Ковачевски на вечерашната трибина која се одржува во спортскиот центар Борис Трајковски во Скопје, по повод една година од преземањето на партијата од неговиот претходник Зоран Заев.

„Политичари и политички партии кои сакаат да го попречат европскиот пат на државата, кои не сакаат државата да изгради врвни институции во кои владее правото. Нема поголем криминал од оние кои не сакаат Северна Македонија да биде дел од земјите на ЕУ во кои владее правото, социјална еднаквост, економски напредок и врвна демократија. Најголем криминал е да сака некој да ја врати својата земја, својата држава назад во 11 години заробеништво, затоа ние со нашите партнери ќе се избориме да го продолжиме нашиот пат, пат на нашата татковина кон полноправно членство на ЕУ“, рече Ковачевски.

Тој додаде дека тие кои ги заборавиле обврските кон граѓаните или не ги исполнуваат дека ќе им се заблагодари.

„Ниту имаме можност ниту смееме ниту ќе дозволиме толеранција кон неефикасност, неспособност и нечесност. Мора да има ред знаече и дисциплина. Немам намера заради малкумина да загрозиме се што е направено и се што треба да се направи во оваа држава и да го оставиме народот на популисти кои ќе продадат се и растурат се за фотељи“, додаде Ковачевски.

Генералниот секретар на СДСМ, Миле Зечевиќ од трибината „Силно и одлучно кон иднината“ повика на обединување околу клучните државни интереси.

„Дојде време тој современ македонски патриотизам да го кренеме на следното ниво! Тоа е македонската европска иднина! Нашиот 4-ти Илиден! Полноправна европска асоцијација која ќе биде новиот камен-темелник во македонската историја. По 903-та, по 45-та, по 91-та, европскиот столб ќе биде нашата четврта македонска република, заедничка татковина на сите кои живееме и кои бескрајно ја сакаме. Имаме врвна задача! Да си дадеме завет и да го исполниме. Како почит за нашите предци, преродбеници, револуционери, партизани. Но и како одговорност за нашите млади македонски генерации“ истакна Зечевиќ

Современиот патриотизам, дополни тој, се вредностите на македонската европеизација!

„Македонската граѓанска свест е европска. Ние физички и ментално припаѓаме кон неа. Затоа и нашето место е во Европа. Ве повикувам сите заедно да застанеме на браникот на современиот патриотизам, на браникот на горда и достоинствена европска Македонија“ повика Зечевиќ.