Консултациите за новиот состав на Комисијата за помилување се во тек, но претседателката на државата не се брза.
Сиљановска Давкова објаснува дека моментално се водат разговори со луѓе од различни сфери, вклучувајќи експерти, претставници од невладин сектор, психолози, невропсихијатри и новинари. За можни промени во начинот на помилување на осудени лица, таа истакнува дека ќе се разгледаат и искуствата на поранешните членови на Комисијата.
„Да, средбата беше неколку пати закажувана и одлагана поради други настани. Мислам дека сега е вистинско време да се сослушаат мислењата на сите претходни членови на Комисијата. Важно е да ги разбереме нивните искуства и сознанија, како и да дискутираме во кој правец треба да се движат промените“, вели Сиљановска Давкова.
Таа додава дека целта е да се создаде структура која ќе ја одразува потребата за правична и ефикасна примена на помилувањата, како и заштита на човековите права на осудените.