Првиот заменик-претседател на Владата, Изет Меџити, најави дека доколку биде избран за градоначалник на општина Чаир, ќе се повлече од извршната власт, а на неговото место ќе дојде доскорешниот министер за здравство, Беким Сали.
„Ние, во рамките на коалицијата ВЛЕН, направивме детални анализи и заеднички ја донесовме одлуката дека во моментот кога ќе се вратам во Општина Чаир како градоначалник, функцијата прв заменик-претседател на Владата ќе ја преземе Беким Сали. Тој е човек кој ги има сите потребни квалитети – искуство, знаење, подготвеност за тимска работа и капацитет да ја извршува функцијата дури и подобро од мене“, изјави Меџити.
Оваа изјава доаѓа во време кога се заоструваат политичките калкулации пред локалните избори, а Чаир се профилира како клучна општина за влијанието на албанскиот политички блок. Изет Меџити, кој претходно веќе ја извршуваше функцијата градоначалник на Чаир, е еден од основачите на ВЛЕН и водечки фигури во политичката сцена меѓу албанските партии во земјата.
Губењето на Чаир би значело тежок удар за партијата.
Беким Сали, кој во јавноста е познат по својата работа како министер за здравство и поранешен кадар на Алтернатива, важи за еден од потенцијалните носители на повисоки државни функции од редовите на ВЛЕН.