Тешка сообраќајна несреќа со фатални последици и елементи на кривично дело ја потресе швајцарската јавност викендов. Во инцидентот што се случи во Шлиерен, кантон Цирих, животот трагично го загуби 39-годишен државјанин на Северна Македонија. Возачот, исто така 39-годишен Македонец, по сударот избегал од местото на настанот без да му пружи помош на својот тешко повреден сопатник.
Настанот се случил доцна во саботата вечерта, а епилогот е едно загината лице, еден уапсен и истрага која сè уште трага по мистериозна сопатничка.
„Летале“ низ зона 30 со џип од 500 коњски сили
Според официјалниот извештај на Кантоналната полиција во Цирих, несреќата се случила во саботата околу 23:30 часот. Возилото, моќен СУВ (џип) марка „БМВ“ со над 500 коњски сили, се движело од улицата „Енгштрингерштрасе“ кон „Грабенштрасе“.
Полициските експерти врз основа на трагите на местото на несреќата заклучиле дека се возело со значително поголема брзина од дозволената, во зона каде ограничувањето е стриктно 30 километри на час.
Откако излегол од десна кривина, возачот ја изгубил контролата над моќното возило. Автомобилот излетал од десната страна на коловозот, при што следувала серија на удари:
- Најпрво откорнал улична светилка;
- Потоа окршил дрво покрај патот;
- На крајот, фронтално се забил во фасадата на станбена куќа.
Кукавички чин: Побегнале и го оставиле пријателот да умре
Најшокантниот дел од трагедијата е постапката на преживеаните непосредно по ударот. При страотниот судар, совозачот – 39-годишен маж од Северна Македонија – се здобил со повреди опасни по живот.
Наместо да повикаат итна помош и да се обидат да го спасат, возачот и уште една засега неидентификувана женска особа која била во возилото, избегале од местото на несреќата.
„Возачот, наводно 39-годишен Северномакедонец, заедно со засега непозната сопатничка, се дале во бегство и го оставиле тешко повредениот маж без да му укажат помош,“ се наведува во полициското соопштение.
Иако спасувачките екипи набрзо пристигнале и го пренеле повредениот во болница, тој им подлегнал на тешките повреди во неделата попладне.
Возачот се предал, по девојката се трага
Полицијата и Јавното обвинителство Цирих-Зил веднаш покренале голема потрага по бегалците. Притиснат од околностите, возачот се појавил во полициска станица во неделата, кратко пред 12:00 часот, и им се предал на властите.
Истрагата продолжува со несмален интензитет. Полицијата сè уште трага по женската особа која била во автомобилот за да се расветли нејзината улога и идентитет. Во акцијата за санација на теренот учествувале противпожарната служба на Шлиерен, приватна компанија за влечење возила и екипи на електродистрибуција поради оштетеното улично осветлување.