Министерот за култура и туризам, Зоран Љутков во емисијата „Ноќно студио“ на 4ТВ, ги отфрли шпекулациите во јавноста дека Агенцијата за филм доделила финансиски средства за снимање на автобиографски филм за познатиот музичар Марко Маринковиќ – Слаткаристика.
За време на своето телевизиско гостување, министерот појасни дека проектот погрешно се врзува за конкретно лице и дека темата воопшто не е Марко. Напротив, станува збор за документарен филм кој третира прашање од големо значење за целото општество – проблемот со пелтечењето.
- Целта на филмот е да ги охрабри децата и возрасните кои се соочуваат со проблеми во говорот.
- Во фокусот е приказната за тоа како една личност може да се снајде и да успее преку уметноста и музиката, и покрај ваквиот проблем.
Поради бурните реакции и погрешните толкувања во јавноста, продуцентот на филмот донел одлука да не продолжи понатаму со државната поддршка и се откажал од доделените средства.
Сепак, документарецот ќе го здогледа светлото на денот. Најавено е дека проектот ќе биде реализиран и без оваа финансиска помош, бидејќи веќе има добиено средства од 3-4 приватни компании, од програмата „Креативна Европа“, како и од Министерството за здравство, со оглед на тоа што темата директно ги засега луѓето кои пелтечат.