Македонија

Власта и опозицијата со спротивставени ставови за животниот стандард – граѓаните пред нови поскапувања

Власта и опозицијата со спротивставени ставови за животниот стандард – граѓаните пред нови поскапувања

Најавеното зголемување на цените на електричната и топлинската енергија повторно ја отвори политичката дебата за животниот стандард, економската состојба и задолжувањето на државата. Додека Владата уверува дека ќе преземе мерки за заштита на граѓаните од ценовни шокови, опозицијата предупредува дека сè поголем број семејства тешко ги покриваат основните животни трошоци.

Премиерот Христијан Мицкоски изјави дека главен приоритет на Владата останува зачувувањето на куповната моќ на населението, особено во услови на зголемени цени на енергенсите на меѓународните пазари.

Според него, цените на одредени енергенси се зголемени и до трипати во споредба со минатата година, што создава дополнителен притисок врз домашната економија.

И покрај најавите за поскапување на струјата и парното, Мицкоски уверува дека Владата ќе настојува да спречи драстични зголемувања што би го погодиле семејниот буџет.

Премиерот се повика и на податоците за движењето на платите, посочувајќи дека во септември годинава реалната нето-плата забележала годишен раст од 5,2 проценти.

Тој направи споредба со истиот период во 2022 година, кога, според неговите тврдења, реалната нето-плата бележела пад од пет проценти.

„Сега сме плус 5,2 проценти, тогаш сме минус пет проценти. Тогаш беше Владата на СДСМ и ДУИ“, изјави Мицкоски, оценувајќи дека економските показатели денес се поповолни во споредба со периодот на претходната власт.

Од друга страна, претседателот на СДСМ, Венко Филипче, смета дека реалната состојба е значително потешка од онаа што ја претставува Владата.

Според него, растечките трошоци за живот, високите цени на храната и најавените поскапувања на енергијата дополнително го намалуваат животниот стандард на граѓаните.

Филипче предупредува дека дел од домаќинствата се соочуваат со сериозни финансиски проблеми и дека претстојната зима ќе претставува дополнителен товар за семејните буџети.

Како дополнителен показател за високите животни трошоци се посочува проценката дека за храна и пијалоци на едно домаќинство месечно му се потребни околу 26.000 денари.

Опозицијата ја критикува и структурата на државниот буџет, оценувајќи дека не се издвојуваат доволно средства за подобрување на стандардот на граѓаните.

Филипче тврди дека при разгледувањето на буџетот не бил прифатен ниту еден амандман на опозицијата со кој се барале дополнителни средства за зголемување на минималната плата и подобрување на студентскиот стандард.

„Зголемување на минималната плата и за тоа нема пари. Зголемување на студентскиот оброк и за тоа исто така нема пари, ама има за партиски тендери“, изјави Филипче.

Политичките несогласувања продолжија и околу прашањето за јавниот долг.

Мицкоски тврди дека дел од зголемувањето на задолженоста е поврзано со обврските за отплата на заеми земени во времето на претходната власт.

Филипче, пак, го оспорува ова образложение, посочувајќи дека отплатата на старите долгови сама по себе не може да биде причина за значително зголемување на јавниот долг без истовремено ново задолжување.

Додека власта и опозицијата продолжуваат со меѓусебните обвинувања, во фокусот остануваат цените на основните производи, трошоците за енергија и можностите за подобрување на животниот стандард.

Претстојниот зимски период ќе биде важен тест за најавените економски мерки, особено во однос на тоа колку евентуалните поскапувања ќе се одразат врз семејните буџети.

Ноќно студио

Најнова епизода

Дали системот реагира навреме? Ноќно студио со обвинителката Спасенка Андонова

Сите епизоди →
Имате вест, приказна или проблем? Пишете ни