Во текот на изминатото деноноќие полицијата регистрирала седум случаи на семејно насилство низ државата, при што четири лица биле лишени од слобода поради физички напади, закани и агресивно однесување кон членови на своите семејства. Настаните се пријавени во Скопје, Гостивар, Струмица, Куманово, Прилеп и Свети Николе.
Во Скопје, 39-годишна жена пријавила дека околу 3 часот по полноќ на подрачјето на Шуто Оризари нејзината малолетна ќерка била физички нападната од нејзиниот 25-годишен партнер. Полицијата презема мерки за расчистување на случајот.
Во Гостивар, полициски службеници го привеле 33-годишниот Р.С. откако неговиот 56-годишен татко пријавил дека бил физички нападнат во семејниот дом. Осомничениот е задржан во полициска станица, а против него ќе биде поднесен соодветен поднесок.
Во струмичко село, приведен е 33-годишен маж кој, според пријавата, агресивно се однесувал кон својата сопруга. За случајот е известен јавен обвинител, а по неговото документирање ќе биде поднесена соодветна пријава.
Во Куманово, 66-годишна жена пријавила дека во својот дом била физички нападната од двајцата свои внуци. Во друг случај во истиот град, полицијата го лишила од слобода 43-годишниот Ж.Д. поради агресивно однесување и закани кон неговата сопруга и син. По завршување на постапката, против него ќе следува соодветна пријава.
Во Прилеп, 25-годишна жена пријавила дека додека престојувала во домот на својата сестра, била физички нападната од својот невенчан сопруг. Полицијата работи на расчистување на случајот.
Во Свети Николе, пак, приведен е 57-годишен маж по пријава дека физички ја нападнал својата 50-годишна сопруга во семејниот дом. По целосното документирање на случајот, против него ќе биде поднесен соодветен поднесок.