До овој момент нема пристигнато понуда за изградба на брзата пруга долж Коридорот 10, изјави денеска министерката за финансии Гордана Димитриеска-Кочоска. Како што посочи, проектот е сложен и на банките им е потребно дополнително време за анализа и појаснување на сите детали.
На прес-конференција во Владата, каде даде отчет за сработеното во првата година од мандатот, Димитриеска-Кочоска нагласи дека рокот за доставување на понудите е продолжен до 7 јули, кога ќе се знаат повеќе информации.
– Интересот е голем. Испративме барање за понуди до 22 финансиски институции, а дополнително уште две банки самостојно изразија интерес, па и до нив испративме барање. Целта е да добиеме што подобри услови и пониска цена за реализација на проектот. Бидејќи има многу прашања, рокот е продолжен за да им се даде време на банките да добијат појаснувања – изјави министерката.
Министерството за финансии во моментов е во постојана комуникација со 24 банки кои треба да испратат понуди за финансирање на изградбата на брзата пруга од Коридорот 10.