Откако се појавија информации дека поранешниот министер од ДУИ, Крешник Бектеши, добил кривична пријава, од ДУИ остро реагираа, нарекувајќи ја акцијата на полицијата „политички прогон“.
Артан Груби и Арбер Адеми изјавија дека ова е продолжение на напорите на владините партии и државните институции да ја ослабнат албанската политичка репрезентација.
„Заканите и политичкиот прогон од страна на владините партии и државните моноетнички институции се продолжение на стратегијата и напорите да се уништи моќната и легитимна албанска политичка репрезентација и да се замени со сервилни марионети. Истовремено, ова служи за покривање на многубројните скандали и неспособности на власта“, изјави Груби.
Адеми, пак, истакна дека ваквите постапки нема да ги скријат неуспесите на владата. „Срамот и скандалите не можете да ги покриете со политички прогон за наводно прекршување на Изборниот законик. Знајте дека ќе не имате пред себе, со храброст и истрајност во нашата мисија да го заштитиме достоинството на албанскиот гласач“, порача Адеми на социјалните мрежи.
ДУИ тврди дека постапките против Бектеши се политички мотивирани и имаат за цел да го поткопаат легитимитетот на албанската политичка репрезентација во Македонија.