Двајца млади скопјани се лишени од слобода откако, според пријавата, физички нападнале 63-годишна жена и ѝ ја одзеле ташната со пари, документи и мобилен телефон. Полицијата реагирала веднаш по пријавениот инцидент и ги пронашла осомничените.
Случајот бил пријавен денеска (28 октомври) во 15:35 часот во СВР Скопје. Жената со иницијали С.В. од Скопје пријавила дека била нападната од две лица, кои потоа ѝ ја одзеле ташната во која имала пари, лични документи, мобилен телефон и други лични предмети, по што побегнале.
По пријавата, полициски службеници од Полициската станица од општа надлежност Ѓорче Петров презеле мерки за пронаоѓање на сторителите. Набргу биле пронајдени и лишени од слобода две лица.
Од МВР информираат дека станува збор за А.Х. (19) и 15-годишен малолетник, двајцата од Скопје. Тие се предадени во полициска станица.
По целосно документирање на случајот, против нив ќе биде поднесена соодветна кривична пријава.