Најмалку две лица загинаа, а 17 се повредени при уривање трикатна зграда во Бруклин, Њујорк. Меѓу повредените се седум деца и еден пожарникар, додека четири лица се во критична состојба.
На местото се распоредени повеќе од 250 пожарникари, а спасувачките екипи продолжуваат да пребаруваат низ урнатините. Засега не е познато колку луѓе останале затрупани.
Градоначалникот на Њујорк, Зохран Мамдани, го опиша настанот како „разорен“ и соопшти дека пожарникарите реагирале во рок од една минута по првиот повик на бројот за итни случаи.
„Ова е исклучително сложена ситуација која брзо се менува, со нестабилни урнатини и опасни празнини под површината“, изјави Мамдани.
На снимките од новинарските хеликоптери се гледаат спасувачи кои ги пребаруваат остатоците од зградата и користат пила за да се пробијат низ урнатините. Едно лице било извлечено и поставено на носилка, која спасувачите внимателно ја пренесувале од рака на рака.
Комесарката на њујоршката противпожарна служба, Лилијан Бонсињоре, најави дека спасувачката операција ќе трае подолго и дека причината за уривањето се истражува.
Во близина претходно бил урнат друг објект поради градежен проект, но засега не е утврдено дали тоа е поврзано со несреќата. Соседната зграда, која делела ѕид со урнатиот објект, останала да стои, но дел од нејзините простории се целосно изложени.
По стемнувањето, екипите го продолжиле пребарувањето со батериски светилки и кучиња трагачи.
Мамдани изрази сочувство до семејствата на загинатите и им посака брзо и целосно закрепнување на повредените.