Прилепската наменска фабрика 11 ОКТОМВРИ-ЕУРОКОМПОЗИТ АД Прилеп направи уште еден клучен чекор кон целосно рестартирање на своите капацитети. Централниот регистар на Република Северна Македонија денеска официјално го одобри уписот на промена во трговскиот регистар, со што и формално се потврдуваат новите лиценци на компанијата за работа со воена опрема.
Според официјалниот документ од Централниот регистар, промената е заведена под деловоден број 35020260021889, по електронски пат преку регистраторот Павлинка Голејшки.
Одобрение за промет во самото седиште на фабриката
Суштината на оваа административна измена се однесува на „Промена на одобренија“. Како правен основ за овој упис се наведува претходно донесеното Решение (бр.17-139/3 од 11.09.2026 година) од страна на Министерството за економија и труд – Управа за наменско производство.
Со ова решение, на компанијата со матичен број ЕМБС 4221486 и се издава:
- Согласност за вршење на внатрешен промет на воени стоки во самите работни простории лоцирани на седиштето на Друштвото во Прилеп.
Уписот во регистарот е спроведен согласно сите законски процедури во државата, вклучувајќи ги одредбите од Законот за едношалтерскиот систем и за водење на трговскиот регистар, како и членовите 62 и 63 од Законот за трговските друштва.
Ова ново одобрение доаѓа во исклучително важен период за „Еурокомпозит“, откако фабриката претрпе сопственичка трансформација и влезе во процес на реорганизација. Добивањето на согласноста за внатрешен промет со воени стоки од ресорното министерство значи дека компанијата ги исполнува строгите безбедносни и технички стандарди во своите производствени погони, што отвора пат за реализација на најавените договори за производство на заштитна опрема.