Вечерва, пред трговскиот центар „Бисер“ во Општина Аеродром, избувнал пожар на новогодишната елка. Како што информира командантот на Противпожарната бригада на град Скопје, Звонко Томевски, најверојатна причина за пожарот се сијаличките на елката.
Пожарникарите добиле дојава за инцидентот околу 18 часот. На местото на настанот интервенирале пет пожарникари со едно противпожарно возило.
– Имаше дојава и пет пожарникари со едно возило излегоа на терен. Пожарот е изгаснат и пожарникарите се вратени, изјави за МИА командантот на Противпожарната бригада на град Скопје Томевски.
Дополнителни истраги ќе утврдат дали причината за пожарот е технички дефект на сијаличките или друга околност.
