Вечерва во Битола се случила сообраќајна незгода во која учествувале две возила, од кои едното се превртело. Според првичните информации, полицијата е на терен и врши увид, а засега нема официјални податоци дали има повредени или загинати лица.
Фотографии од местото на несреќата веќе кружат по социјалните мрежи, а загрижени граѓани бурно реагираат на случувањето, повикувајќи на одговорност и построги казни за несовесните возачи.
„Десеттиот дел на ‘Брзи и бесни’ вечерва продолжи со снимање низ битолските улици. Деца, берете ум – Битола не е град за трки и беснеење. Еден невин живот можи многу да не чини, сите имаме деца по улици, дали пеш или со точаци“, велат граѓаните на Фејсбук.
Граѓаните бараат институциите конечно да преземат поостри мерки и да воведат повисоки казни за предизвикување сообраќајни незгоди, наместо, како што велат, „сè да се решава со европски“.
„Кој е крив нека си плати минимум 500 и повеќе евра, без разлика дали е полесна или потешка сообраќајна незгода“, се вели во објавата на Фејсбук.
Од полицијата се очекува повеќе детали по завршувањето на увидот.