Голем пожар на отворен простор беснее на територијата на општина Чучер Сандево, над магистралниот пат Скопје – Блаце, кој избувна вчера попладне. Во акцијата за негово гасење се вклучени два полициски и еден армиски хеликоптер, како и единици на Дирекцијата за заштита и спасување (ДЗС) со Хермелин цистерна, возило Пинцгауер и теренец „Амарок“. Поддршка дава и скопската Бригада за противпожарна заштита (БППЗ), со повеќе пожарникари и противпожарни возила.
Според очевидци, пожарот започнал во близина на патот кон Блаце, а како можна причина се наведува фрлен отпушок од цигара од возило во движење или евентуално намерно потпалување.
Надлежните упатија апел до граѓаните за совесно однесување и предупредија никогаш да не се фрлаат отпушоци од цигари надвор од возило, дури и кога се мисли дека се изгаснати. „Доколку забележите пожар, веднаш јавете на бројот за итни случаи 112“, порачаа од службите.