Последиците од силното невреме што го зафати Скопје продолжуваат да се санираат. По паднатите дрвја и оштетената урбана опрема во Градскиот парк, екипите на Град Скопје започнаа со обновување на зеленилото и засадување нови садници.
Од Град Скопје информираат дека денеска се засадени 60 нови садници јавор и јасен, кои треба да придонесат за повеќе зеленило, сенка и почист воздух во еден од најпосетуваните делови на градот.
„Страшното невреме, проследено со силен ветер со оркански удари, остави тешки последици низ градот, но и во срцето на Скопје – во Градскиот парк. Паднаа голем број дрвја, а беше оштетена и урбаната опрема“, велат од Град Скопје.
По вчерашната акција за расчистување на последиците, денес продолжија активностите за враќање на зелената површина во првобитната состојба. Од градската администрација најавуваат дека ова е само почеток и дека паркот ќе биде дополнително збогатен со нови дрвја, зеленило и содржини.
„На местото на секое паднато дрво ќе никне нова надеж, а паркот повторно ќе биде уште позелен, поубав и подостоен за скопјани“, порачаа од Град Скопје.
Паралелно со обновата на Градскиот парк, екипите продолжуваат со отстранување и санација на штетите предизвикани од невремето на повеќе локации низ Скопје.