Германија не треба да ги затвора нуклеарните централи кои во моментов произведуваат енергија, ако тоа значи повеќе согорување на јаглен, рече Грета Тунберг.
„Ако тие се веќе во функција, мислам дека е погрешно да се затворат за да се фокусираат на јаглен“, рече 19-годишниот шведски активист за климата во интервју за германскиот ТВ канал Das Erste.
Зелените бараат затворање на нуклеарните централи
Германија ја промени својата политика со тоа што одлучи да ги задржи во функција последните две нуклеарни централи во обид да обезбеди снабдување со енергија. Предизвика политичка бура бидејќи владејачката коалиција на канцеларот Олаф Шолц ја вклучува и Партијата на зелените, која долго време се залага за трајно излегување од нуклеарната енергија, пишува Блумберг.
Германија се повеќе се потпира на електрани на јаглен за да го надомести недостигот на енергија предизвикан од намалувањето на протокот на природен гас во Европа преку цевководи од Русија. Емисиите се зголемуваат на краток рок бидејќи владата работи на ограничување на кризата без преседан.
Катастрофата во Фукушима го сврте јавното мислење
Земјата со најголема европска економија планираше да ги затвори нуклеарните реактори до крајот на годината, откако јавното мислење се сврте против изворот на енергија по катастрофата во јапонската Фукушима.
Франција обично извезува електрична енергија во Германија во текот на зимата кога побарувачката расте, но прекините на нуклеарните реактори таму се закануваат да го намалат снабдувањето низ Европа и да предизвикаат прекини на струја.