ГРУЗИСКАТА претседателка Саломе Зурабишвили, во спротивност со нејзината влада, во понеделникот ги повика европските земји да се соочат со, како што рече, обидот на Русија да наметне контрола врз нејзината земја.
Претседателот Зурабишвили говореше по четвртата ноќ од судири меѓу демонстрантите и полицијата, откако минатата недела владејачката партија Грузиски сон објави дека ги прекинува преговорите за пристап во Европската унија. Критичарите тоа го гледаат како потврда за оттргнувањето под влијание на Русија од прозападните политики кон орбитата на Москва, што владејачката партија го негира.
Зурабишвили, чии овластувања се главно церемонијални, рече дека Русија, која веќе е во војна во Украина, спроведува „хибридна стратегија“ против Грузија и други земји како Молдавија и членката на НАТО и ЕУ, Романија. „Постои многу силна потреба за многу јасна морална и политичка поддршка“ од Европа, рече 72-годишниот претседател, кој е роден во Франција од грузиски родители, а некогаш служеше како амбасадор на Франција во Грузија.
Портпаролот на Кремљ, Дмитриј Песков, го негираше руското мешање во ситуацијата во Грузија, што ја спореди со револуцијата на Мајдан во Украина во 2014 година, со која беше соборен прорускиот претседател. Поранешниот руски претседател Дмитриј Медведев во неделата предупреди дека Грузија „брзо се движи по украинскиот пат, во темна бездна“, предвидувајќи дека ќе заврши „многу лошо“.
Соединетите Американски Држави и ЕУ изразија загриженост поради, како што гледаат, демократското назадување во Грузија, јужнокавкаска земја со 3,7 милиони жители која се наоѓа на раскрсницата на Европа и Азија и некогаш била дел од Советскиот Сојуз.
Владата, која претходно оваа година усвои закон против „странски агенти“ и воведе ограничувања на правата на ЛГБТ, вели дека дејствува за да ја заштити Грузија од надворешно мешање и да спречи да биде вовлечена, како Украина, во војна со Русија. Премиерот Иракли Кобахидзе ја обвини опозицијата за „координирано насилство“ со цел уривање на уставниот поредок. Во понеделникот, Кобахиџе ја отфрли можноста за разговори меѓу владата и опозицијата, која го бојкотира парламентот и ги поддржа уличните протести, објави руската новинска агенција ТАСС.
Во неделата вечерта, илјадници демонстранти повторно се собраа во главниот град Тбилиси, при што некои фрлаа запаливи уреди кон полицијата, која одговори со водени топови и солзавец. „Тука сум од многу едноставна причина, да ја бранам мојата европска иднина и демократијата на мојата земја“, рече еден од демонстрантите, Николоз Мируашвили.
Некои демонстранти останаа надвор цела ноќ, но полицијата на крајот го прекина ќор-сокакот со тоа што ги оддалечи од зградата на парламентот.
Грузиското министерство за внатрешни работи соопшти дека 21 полицаец биле повредени во протестите во текот на ноќта, додека 113 се повредени од почетокот на тековните немири.
Протести против замрзнувањето на преговорите со ЕУ
Десетици демонстранти исто така беа повредени во последните денови, а САД ја осудија, како што ја нарекоа, прекумерната употреба на полициска сила. Грузискиот јавен обвинител изјави дека 124 од 156-те лица уапсени на собирите се пожалиле дека полицијата употребила насилство врз нив, нарекувајќи го тоа „многу вознемирувачка бројка“.
Лидерот на опозициското движење Коалиција за промени, Зураб Јапаридзе, беше накратко приведен во полиција, но подоцна на социјалните мрежи објави дека е ослободен.
Стотици дипломати и државни службеници потпишаа отворени писма протестирајќи против одлуката да се прекинат преговорите со ЕУ и да се запре примањето средства од Унијата на четири години. Најмалку четворица грузиски амбасадори поднесоа оставки.
Илија Топурија, борец со боречки вештини со голем број следбеници во земјата, во објава на Инстаграм напиша: „Јас сум против одлуката да се прекинат преговорите за пристапување во Европската унија. Се срамам да видам како се третираат децата од Грузија Ова не се нарекува слобода“.
Зурабишвили вели дека нема да се повлече од претседателската функција кога ќе и истече мандатот овој месец, бидејќи парламентот што ќе го избере нејзиниот наследник е избран на изборите во октомври, за кои опозицијата тврди дека биле наместени.
Од Изборната комисија велат дека гласањето било фер. Премиерот Кобахидзе во неделата изјави дека Зурабишвили емотивно реагира на изборниот пораз на опозицијата и дека ќе мора да ја напушти претседателската палата на крајот на месецот.
Трите балтички земји ја повикаа Европската комисија да воведе санкции против грузиските владини претставници поради бруталната полициска акција врз демонстрантите.
Естонија, Латвија и Литванија заеднички воведоа санкции против 11 високи грузиски функционери и сакаат ЕУ да го следи примерот.
Меѓу санкционираните се Биџина Иванишвили, милијардер, основач на владејачката партија Грузиски сон, министер за внатрешни работи и неговите заменици. „Ним им се одбива влез во Литванија поради нивната одговорност за кршење на човековите права“, напиша во понеделникот литванскиот министер за надворешни работи Габриелиус Ландсбергис на платформата X.