Серверите на Oпштина Аеродром од пред три дена се хакирани, а службите во Општината не можат да работат, бидејќи им е кажано да не ги вклучуваат компјутерите додека не се реши случајот, пишува СДК.мк.
Градоначалникот на Општина Аеродром Тимчо Муцунски потврдува дека Општината била цел на хакерски напади од странски поединци или организирани групи, но додава дека е информирана полицијата и се преземаат активности за расчистување на случајот.
„За нас најважно е дека со ваквиот напад не е доведена во прашање безбедноста на класифицирани, доверливи информации или пак лични податоци. Единствено настанот има влијание на секојдневното и нормално извршување на работните задачи од страна на општинската администрација. Информациите кои ги добив од страна на вработените, говорат дека состојбата ќе биде вратена во нормала во најкраток временски рок, односно веќе во следните денови ќе имаме функционален информатички систем“, вели Муцунски.