Израел најави дека воздушните напади ќе траат со денови, но му порача на Советот за безбедност на Обединетите нации да не интервенира во сирискиот конфликт
Израелската армија напредуваше на околу 25 километри југозападно од Дамаск во упадот во Сирија, соопштија во вторникот сириски безбедносни извори, откако Израел зазеде тампон-зона на југот на земјата и изврши воздушни напади врз сириската армија и воздушните бази во текот на ноќта. Воената операција на Израел во Сирија дојде два дена откако бунтовничката алијанса брзо го собори претседателот Башар ал Асад и во време кога регионот и светските сили се загрижени за понатамошниот развој на настаните.
Сириски безбедносни извори изјавија дека израелските војници стигнале до Катана во Сирија, 10 километри источно од демилитаризираната зона што ја дели Голанската висорамнина окупирана од Израел од Сирија. Израел изјави дека нема да се вклучи во сирискиот конфликт и дека окупацијата на тампон зоната е одбранбен чин. Египет, Катар и Саудиска Арабија го осудија упадот. Саудиска Арабија рече дека овој потег ќе ги „уништи изгледите на Сирија за враќање на безбедноста“.
Регионални безбедносни претставници и претставници на распуштената сириска армија изјавија дека силните израелски воздушни напади врз воени објекти и воздушни бази низ Сирија продолжиле во текот на ноќта, уништувајќи десетици хеликоптери и авиони, како и стратешка опрема на Републиканската гарда во и околу Дамаск. По приближно 200 напади, не остана ништо од стратешката опрема на сириската армија, додаваат тие.
Израел најави дека воздушните напади ќе траат со денови, но му порача на Советот за безбедност на Обединетите нации да не интервенира во сирискиот конфликт. Тел Авив соопшти дека презел „ограничени и привремени мерки“ исклучиво за да ја заштити сопствената безбедност.