Акцијата „Чисто лице“, која ја спроведоа МВР и Обвинителството за гонење на организиран криминал на 23 и 24 април, откри застрашувачка шема во која здравјето на граѓаните било жртвувано за огромен профит. Лишени од слобода се 14 лица, а кривично ќе одговараат вкупно 19 физички и шест правни лица, меѓу кои лекари од ГОБ „8 Септември“, Универзитетската клиника за дерматологија, сопственици на познати ординации и царински службеник.
Фотографиите кои ги објави МВР од запленетата стока откриваат дека во ординациите низ Скопје, Битола и Струмица завршувале препарати кои на пакувањата ја носат ознаката „Not intended for sale in EU“. Ова е јасен доказ дека производите се наменети за пазари со слаба или никаква регулатива.
Според пазарната анализа која ја направи 4NEWS.mk, цената на овие производи на нелегалниот пазар е енормна, додека безбедносните стандарди се нула:
| Производ | Потекло и намена | Проценета цена на „црно“ |
| Dysport (500U) | Ботокс од Ipsen (Франција/ВБ). Бара строг „ладен ланец“. | $300 – $420 по вијала |
| Revolax Deep | Филер од Across Co. (Ј. Кореја). Нема одобрение од МАЛМЕД. | $50 – $60 по шприц |
| Kiara Reju | Скин-бустер од BioPlus Co. (Ј. Кореја) за регенерација. | $70 (пакување) |
| X-pro Cream | Силен анестетик (VIVOZON, Ј. Кореја) во пакување од 450g. | $110 по канта |
| Liporase | Хијалуронидаза за „бришење“ на грешки од лоши филери. | $15 по вијала |
Системски скандал: Цариник примал поткуп, лекари аплицирале фалсификати
Истрагата потврди дека ова не е обична полициска хроника, туку длабоко вкоренета корупција. Царински службеник во два наврати свесно затворил очи пред нелегалниот увоз од Србија, Кореја и Турција, овозможувајќи опасните материи да влезат без никаква контрола.
Она што најмногу ја вознемири јавноста е фактот дека препаратите биле складирани во несоодветни услови. Фотографиите покажуваат ботокс расфрлан во обични патнички ладилници, што директно го уништува неговиот хемиски состав и го прави токсичен за организмот.
Опасноста е реална: Слепило, некроза и мозочен удар
Додека докторите од јавното здравство и приватните газди ги триеле рацете од профит, пациентите биле изложени на смртна опасност. Светските медицински авторитети (FDA и NHS) предупредуваат дека нелегално внесени филери можат да предизвикаат:
- Некроза на ткиво (изумирање на кожата);
- Трајно слепило доколку препаратот влезе во крвен сад;
- Мозочен удар и тешки инфекции.
