Портпаролот на Кремљ Дмитриј Песков изјави дека рускиот претседател Владимир Путин одобрил давање азил на Башар ал Асад, соборениот лидер на режимот Баас во Сирија, и неговото семејство.
Песков со новинарите во главниот град Москва ги оцени последните случувања во Сирија. Осврнувајќи се на одлуката на Русија да обезбеди засолниште за Асад и неговото семејство, Песков рече: „Таквите одлуки не се носат без дозвола на претседателот. Ова е негова одлука“.
Тој изјави дека Путин не планира да се сретне со Асад.
Песков не сакаше да даде информации каде се наоѓа Асад. Тој се осврна и на ситуацијата во врска со руските воени бази Хмејмим и Тартус во Сирија.
„Ова е важно прашање. Малку е рано да се зборува за тоа. Во секој случај, ова е прашање за кое треба да се разговара со оние кои ќе бидат на власт во Сирија. Сега има промени и екстремна нестабилност. Периодот продолжува и затоа е потребно време и сериозни консултации“, рече Песков.
Тој посочи дека се преземени неопходните чекори за обезбедување на безбедноста на овие бази. Тој го оцени и форматот Астана создаден од Русија, Турција и Иран во врска со сириското прашање.
„Овој формат ја изгуби својата цел. Од друга страна, тој секогаш останува на сила како механизам за размена на мислења и политички консултации меѓу земјите. Вака или онака, овие консултации ќе продолжат“, објасни Песков.
Портпаролот на Кремљ додаде дека тие имаат интеракција со Турција и другите земји во регионот во врска со ситуацијата во Сирија.
Кон крајот на ноември дојде до интензивирање на конфликтот меѓу антирежимските вооружени групи и силите на режимот на Башар ал Асад во Сирија. Групите воспоставија превласт во најголемите провинции како Алепо, Идлиб, Хама и Хомс помеѓу 30 ноември и 7 декември. Опозициските сили започнаа молскавична офанзива, освојувајќи клучни градови, а потоа, во неделата, главниот град Дамаск.
Брзиот напредок, поддржан од дезертираните армиски единици, доведе до колапс на режимот на Асад по 13 години граѓанска војна. Асад и неговото семејство побегнаа во Москва.