Општината ги демантира гласините за оставка
Градоначалникот на Општина Карпош, Сотир Лукровски, не се повлекува од функцијата, туку е привремено отсутен поради здравствени причини. Ова го соопштија од локалната самоуправа по шпекулациите за негова можна оставка.
Од Општината појаснуваат дека неговите надлежности во овој период ќе ги извршува Неделчо Крстевски, член на Советот од редовите на ВМРО-ДПМНЕ и поранешен портпарол на Град Скопје.
Официјално соопштение од Општина Карпош
Во официјалниот демант на Општината се наведува:
- Градоначалникот Лукровски користи боледување од здравствени причини.
- Општината продолжува да работи со целосен капацитет и посветеност кон граѓаните.
- Согласно законските процедури, привремен вршител на должноста (в.д. градоначалник) е назначен Неделчо Крстевски.
Реакција на Стевчо Јакимовски
Поранешниот градоначалник на Карпош, Стевчо Јакимовски, упати остри критики по повод оваа одлука. Тој обвинува дека Лукровски ја одбегнува одговорноста и му препушта на партиски кадар да ја води Општината.
„Жителите на Карпош гласаа за градоначалник, а добија човек кој не сака или не може да ја води општината. Недозволиво е избраниот градоначалник да се крие зад партиски заменици, адвокати и секретари, додека одговорноста за водење на Карпош исчезнува,“ изјави Јакимовски.
Резултати од локалните избори
Сотир Лукровски победи на локалните избори минатиот октомври во вториот круг. Тој го победи Јакимовски со разлика од околу 1.000 гласови, односно 13.265 наспроти 12.178 гласа за неговиот противкандидат.
