Позадината на случајот, според австриското обвинителство, најверојатно е расправија во нарко-средината. Иако обвинетиот државјанин на Северна Македонија молчел при полициските сослушувања, сепак испратил „признавање“ до Обвинителството. На суд, пак, изјавил дека само се бранел.
Според обвинението, на 14 јануари обвинетиот во груб тон го повикал Чеченецот на средба. Жртвата дошла со автомобил, а тој му пукал „од непосредна близина“ во вратот преку отворениот прозорец. Чеченецот преживеал со тешки повреди. Осомничениот бил уапсен неколку недели подоцна во Швајцарија.
Иако формално не дал исказ за настанот – по совет на неговиот адвокат – обвинителството пред судот изнесе дека тој испратил писмо на електронското сандаче во кое јасно напишал дека тој пукал. Во пораката, според обвинителката, тој се пожалил и зошто жртвата не се гони. Според истрагата, причината за конфликтот е тоа што Чеченецот се вмешал во нарко-бизнисите на обвинетиот и се обидел да го уценува.
„Јас сум виновен, но не онака како што мислите“, изјавил обвинетиот пред судот. Според неговата верзија, Чеченецот го повикал ден пред настанот и му побарал „рекет“, заканувајќи се дека „инаку ќе има мртви“, поткрепувајќи ја заканата со видеа од обезглавувања. Обвинетиот додал дека не знаел зошто токму од него барале пари, но се сомневал во мафијашки врски на жртвата.
„Стравував, тој ме навредуваше, ми се дереше и во еден момент извади голем нож. Сакаше да ме убие. Затоа ја извадив мојата пушка и го погодив во раката. Не сакав да го убијам“, рекол обвинетиот. Тој, исто така, негирал дека писмото до Обвинителството било испратено од него: „Немам е-мејл адреса, никогаш не сум напишал е-мејл.“
Во текот на судењето ќе бидат сослушани повеќе сведоци, а пресудата може да биде донесена уште во понеделник. Доколку биде прогласен за виновен, обвинетиот се соочува со казна затвор од 10 до 20 години или доживотно.