Министрите за внатрешни работи на Македонија и Србија, Панче Тошковски и Ивица Дачиќ, денеска во Белград го потпишаа договорот за воспоставување заеднички контроли на граничниот премин Табановце – Прешево за меѓународен патен сообраќај. Со ова се отвора пат за целосна примена на таканаречениот „One Stop“ систем, кој треба значително да го забрза протокот на луѓе и стоки меѓу двете земји.
„Со имплементација на системот очекуваме двојно побрз трансфер на луѓе, а по ратификацијата на договорот ќе започнеме и тест фаза. Целта ни е пред почетокот на летната сезона системот да биде ставен во целосна функција“, изјави министерот Панче Тошковски.
Договорот предвидува полициските службеници на земјата-домаќин да ја спроведуваат и влезната и излезната гранична контрола, што значително ќе ги скрати процедурите и чекањето за патниците. Како што објасни српскиот министер Ивица Дачиќ, секоја земја и понатаму ќе има право да преземе дополнителни мерки при сомнеж за одредени патници.
И двајцата министри ја нагласија добрата билатерална соработка, која ќе продолжи и во други области. И оваа летна сезона се планира размена на полициски службеници: српски полицајци ќе патролираат во Охрид, а македонски ќе учествуваат на настани во Србија, како фестивалот „Exit“.
Освен граничната соработка, се зајакнува и заедничката борба против организираниот криминал и нерегуларната миграција. Според Дачиќ, годинава е забележано 40% намалување на нелегалните преминувања во однос на истиот период лани.
„Соработката ќе продолжи и во делот на борбата против миграцијата, но и во поддршката при вонредни ситуации, како што се пожарите. Србија и досега испраќала хеликоптери и персонал за гаснење пожари во Северна Македонија“, додаде Дачиќ.
Системот „One Stop“ веќе е во функција на граничниот премин Блаце – Елез Хан со Косово, а наскоро ќе се имплементира и со Албанија. Со тоа, Македонија ќе воспостави ваков модел со сите соседни земји што не се членки на Европската Унија.