Координаторот на пратеничката група на ВМРО-ДПМНЕ, Никола Мицевски вечерва на собраниската седница за владината реконструкција ја вмеша и родилката од Дебар на која и беа извадени неколку органи.
„Ја мислев дека и оваа родилкава ќе ја препишете на некои од докториве на ВМРО-ДПМНЕ, оваа родилкава од Дебар што е, со извинение, ја демонтиравте пола жена и судството најде за сходно дека таму нема ништо“, рече Мицевски.
Една од пратеничките од владејачкото мнозинство викаше „Срамота, срамота“, на што Мицевски порача дека премиерот требало да се извини на пратениците зашто ги излажал за министрите со кои ќе го истера мандатот.
„Јас ќе ви кажам што е срамота, срамота е што молчите за таа жена вие, срамота е што глас не дигнавте за таа жена, од место зборите… Јави се тука да ти кажам што е срамота. Борец за женски права цел живот, а се криете таму кај што не треба. Да, да, срамота е“, порача Мицевски.
По оваа изјава, тој повторно излезе на говорницата и се извини за зборот што го употребил за родилката.