Опозицискиот Социјалдемократски сојуз на Македонија (СДСМ) иницираше масовна граѓанска мобилизација преку петиција насловена „Одбрана на Македонија!“. Партијата алармира дека постојат сериозни индиции, базирани на написи во релевантни британски медиуми, дека актуелната власт води преговори земјава да стане „базна дестинација“ за враќање на мигранти, сценарио кое според нив претставува закана за националната безбедност.
Преку овој повик, СДСМ бара од граѓаните да го кренат гласот против, како што велат, опасните и антидржавни политики кои можат трајно да ја дестабилизираат демографската и безбедносната слика на државата.
„Британското сценарио“ и стравот од насилство
Во образложението на петицијата, СДСМ се повикува на информации од меѓународниот печат кои сугерираат дека Македонија би можела да стане тампон-зона за мигрантите кои Западна Европа не сака да ги прими.
Партијата предупредува дека искуствата од Европа се загрижувачки.
„Европската статистика јасно покажува дека земјите кои воделе лоши политики за интеграција на мигранти се соочиле со зголемено насилство, криминал, немири и конфликти во заедниците. Дури и најразвиените држави како Германија, Британија и Шведска со години едвај се справуваат со овој предизвик,“ се наведува во партискиот допис.
Главната дилема што ја поставува опозицијата е капацитетот на домашните институции. Според нив, ако економските гиганти имаат проблем, Македонија, како држава со „слаби, нефункционални и под партиска контрола институции“, нема никакви шанси успешно да се справи со таков прилив.
ЕУ ги затвора вратите, Македонија ги отвора?
СДСМ укажува и на променетиот геополитички контекст. Додека Европската Унија ги заострува мерките со построги правила за азил и побрзи депортации, се стравува дека Македонија ќе стане депонија за проблемите на Унијата.
Петицијата поставува две клучни прашања до јавноста:
- Дали ќе дозволиме отворање центри за мигранти во различни општини?
- Дали ќе дозволиме сценарија во кои илјадници мигранти ќе добиваат македонски пасоши?
Повик за акција: „Да не биде предоцна“
Со слоганот „Време е за заедничка акција“, СДСМ ги повикува граѓаните да кажат гласно „НЕ“ за мигрантските бази и „НЕ“ за националното предавство.
„Со потпишување на оваа петиција помагаме во зачување на нашата татковина. Да не чекаме мрачни сценарија да се остварат, ќе биде доцна,“ апелираат од партијата, повикувајќи на итна мобилизација за заштита на иднината на Македонија.
