Регулаторната комисија за енергетика, водни услуги и услуги за управување со комунален отпад (РКЕ) донесе нова одлука со која се зголемуваат малопродажните цени на нафтените деривати во просек за 3,47 проценти во однос на претходната одлука од 27 април 2026 година.
Според РКЕ, причината за корекцијата е растот на референтните цени на светскиот пазар. Во споредба со претходната пресметка, бензините бележат зголемување од 5,324 проценти, дизелот за 2,817 проценти, екстра лесното масло за 3,394 проценти, а мазутот за 8,305 проценти.
Дополнително, курсот на денарот во однос на американскиот долар во периодот на пресметка е повисок за 0,3444 проценти.
Во новата пресметка се земени предвид намалените акцизи од 4 денари за литар кај ЕУРОДИЗЕЛ (Д-Е V), како и намалените акцизи од 2 денари за литар кај бензините ЕУРОСУПЕР БС-95 и ЕУРОСУПЕР БС-98. Вклучен е и намалениот ДДВ од 10 проценти за бензините, додека ова не важи за дизелските фракции и мазутот.
Новите максимални цени ќе важат од 5 мај 2026 година од 00:01 часот.
Цената на ЕУРОСУПЕР БС-95 ќе изнесува 85 денари за литар, додека ЕУРОСУПЕР БС-98 ќе се продава по 87 денари за литар.
ЕУРОДИЗЕЛ БС (Д-Е V) ќе чини 93,50 денари за литар, а Екстра лесното масло за домаќинство (ЕЛ-1) ќе се продава по 98,50 денари за литар.
Цената на мазутот М-1 НС се зголемува за 3,064 денари за килограм и ќе изнесува 49,720 денари.
Со новата одлука, бензините и екстра лесното масло поскапуваат за 2,50 денари по литар, дизелот за 2 денари по литар, додека мазутот бележи раст од 3,064 денари по килограм.
Од РКЕ потсетуваат дека станува збор за максимални цени, а трговците на големо и мало можат да ги формираат и пониско од утврдените износи.
