Проблеми во дистрибуцијата и ненавремената испорака на лекот Phesgo предизвикале одложување на терапијата за пациентки кои денеска требало да ја примат на Универзитетската клиника за радиотерапија и онкологија. Од Клиниката упатија јавно извинување и најавија дека преземаат мерки лекот да биде обезбеден во најкус можен рок.
Во соопштението објавено на социјалните мрежи, од Клиниката посочуваат дека се свесни за значењето на навременото и континуираното примање на терапијата, како и за загриженоста и неизвесноста со кои се соочиле пациентките поради одложувањето.
„Свесни сме колку е важна навремената и континуирана терапија и искрено жалиме за загриженоста, неизвесноста и непријатностите што ги предизвика оваа ситуација“, наведуваат од Клиниката.
Од таму појаснуваат дека причината за одложувањето се проблеми во дистрибуцијата и испораката на лекот, за кои велат дека се надвор од нивната директна контрола.
Воедно, упатуваат извинување до сите пациентки кои денеска требало да ја примат терапијата и уверуваат дека преземаат сè што е во нивна надлежност таа да биде обезбедена што е можно побрзо.
Од Клиниката им се заблагодарија на пациентките за трпението, разбирањето и довербата.