Претседателот на Владата, Христијан Мицкоски, денеска ќе присуствува на свеченото пуштање во употреба на експресниот пат Куманово (Страцин) – Крива Паланка, дел од Коридор 8. Овој значаен инфраструктурен проект опфаќа делници со вкупна должина од 25,55 километри и беше започнат во мај 2018 година.
Проектот има вкупна инвестициона вредност од 93,7 милиони евра. Од нив, 80,2 милиони евра се обезбедени преку средства од Светска банка, додека 13,5 милиони евра се грант средства.
Како што информираат од Владата, изградбата беше поделена на две фази:
- Лот 1: Делницата Длабочица – Страцин (Чатал) со должина од 15,55 километри и инвестиција од 43,75 милиони евра.
- Лот 2: Делницата Крива Паланка – Длабочица со должина од 10 километри, завршена навреме, со инвестиција од 50,54 милиони евра. Двете фази беа финансирани од Светска банка и грантови.
Работите на делницата Длабочица – Страцин првично беа доверени на италијанската компанија „Тирена Скави“, но поради слаб напредок, договорот беше раскинат и проектот го продолжи австриската „Страбаг“. Втората делница, Крива Паланка – Длабочица, ја градише македонската компанија „Гранит“. Надзорот на проектот го спроведе „ДИВИ Македонија“.
Со завршувањето на овој експресен пат, Коридорот 8 добива нова димензија, обезбедувајќи побрза и побезбедна поврзаност меѓу клучните региони во земјата.