Приказната што ја допре цела Босна и Херцеговина, но и регионот имаше неверојатен епилог – популарниот рапер Јала Брат се согласи да сними песна со Саша Шуњко, млад човек со Даунов синдром од клубот „Змејово срце“ во Тузла.
Нивниот дует „SALE BRATE“ не е само музичка соработка, туку порака за љубовта, еднаквоста и човечноста.
Песната е напишана од Омер Исовиќ, основачот на „Змејово срце“ и пријател на Саша, и зборува за неговиот живот, соништата и луѓето што му го промениле секојдневието откако почнал да работи како келнер во кафуле кое станало симбол на инклузија.
„Ова не е само дует. Ова е доказ дека границите постојат само во главите, а не во срцата“, рекоа од „Змејово срце“.
Тие му се заблагодарија на Јала Брат што ја препозна енергијата, талентот и љубезноста на Саша и што покажаа дека вистинската величина не лежи во славата, туку во човечноста.
Откако приказната за овој насмеан Тузланец се прошири на социјалните мрежи и медиумите, поддршката стигна од сите страни. Стотици луѓе ги споделија неговите фотографии и пораки за поддршка, а сега, со песната „SALE BRATE“, Саша и Јала ја шират пораката дека љубовта и инклузијата победуваат заедно.
„Тузла е горда. Змејското срце чука уште посилно“, соопшти кафулето.
„Змејското срце“ не е обично кафуле – тоа е место кое комбинира добро кафе, топла атмосфера и огромна човечност. Тука работат и луѓе со Даунов синдром, и преку секоја насмевка и секое нарачано кафе, се испраќа пораката дека секој има право на можност, почит и љубов.