Двегодишниот мандат на Панче Тошковски на чело на Министерството за внатрешни работи (МВР) донесе целосен распад на безбедносниот систем, низа скандали, партизација на полицијата, неказнивост и отворена заштита на криминалци, обвинуваат од Социјалдемократскиот сојуз на Македонија (СДСМ).
Од опозициската партија реагираат дека иако Тошковски ветувал правда и неселективност, реалноста во изминатите две години покажала дека криминалот и корупцијата цветаат, а одговорност нема за ниту еден случај.
„Тошковски велеше: ‘брат да ми е, ќе одговара’, ама денеска никој не одговара. Нема одговорност за ниту еден криминален тендер, ниту пак за петте тони дрога кои поминаа преку македонската граница пред шест месеци“, се вели во соопштението на СДСМ.
Серија трагедии и системски пропусти на полицијата
СДСМ посочува дека изминатиот период е одбележан со серија трагедии, убиства, вооружени пресметки и драстичен раст на семејното и врсничкото насилство. Како особено тежок белег на овој мандат ја издвојуваат трагедијата во Кочани.
- Трагедијата во Кочани: Опозицијата потсетува на несреќата во која згаснаа 63 човечки животи, главно на млади луѓе. Наместо расветлување, од СДСМ тврдат дека јавноста видела само обиди за префрлање на вината и заштита на актуелни функционери.
- Игнорирање на пријави за насилство: Во Скопје беа убиени млада жена и дете и покрај повеќе од десет претходни пријави до полицијата. Во Велес, каде исто така беа убиени жена и нејзиниот татко, жртвата претходно лично му пријавувала на министерот. Во Старо Нагоричане, сериски убиец со години одземал животи на жени пред институциите воопшто да реагираат.
Серија скандали поврзани со функционери и обезбедувањето на Мицкоски
Од СДСМ упатија жестоки критики и за кадровските решенија на Тошковски, тврдејќи дека искусни професионалци се деградираат за сметка на партиски подобни кадри, а криминалот во близина на власта се заташкува.
„За Симе од сликите со Мицкоски, кој пукаше со ‘калашников’, одговорност нема. За командант на ‘Тигрите’ е поставен човек кој спречувал инспекциска акција и физички нападнал инспектори – и за тоа нема одговорност“, обвинуваат од опозицијата.
Партијата додава и дека членови од обезбедувањето на премиерот Христијан Мицкоски се вмешани во тешки прекршувања на законот – од продавање службени информации за пари, па сè до условни казни за семејно насилство, по кои изостанале соодветни санкции од МВР.
„Две години МВР на Тошковски не гони криминал, туку го штити криминалот на власта. Тошковски останува на функцијата само затоа што зад него стои Христијан Мицкоски и меѓусебно се штитат. Граѓаните на Македонија заслужуваат професионална полиција и институции во кои законот ќе важи еднакво за сите“, заклучуваат од СДСМ.