Севернокорејските сили им се придружија на руските сили во борбите во Курск, а Вашингтон има индиции дека севернокорејските војници се убиени и ранети, соопшти денеска Пентагон.
„Проценуваме дека севернокорејските војници учествувале во борбите во Курск… имаме индиции дека претрпеле загуби, и убиени и ранети“, изјави за новинарите портпаролот на Пентагон, генерал-мајор Пат Рајдер.
Рајдер рече дека нема информации за бројот на севернокорејските жртви. Тој додаде дека севернокорејските сили се приклучиле на борбите минатата недела.
Украина во понеделникот соопшти дека севернокорејските единици кои се борат за Русија претрпеле загуби од најмалку 30 војници убиени или ранети околу неколку села на линијата на фронтот во рускиот регион Курск во текот на викендот.
Соопштението на украинската воена разузнавачка агенција дојде откако украинскиот претседател Володимир Зеленски во саботата изјави дека Русија во значителен број ги користи севернокорејските сили во Курск, руски регион што Украина го нападна во август.