Аеродромот Шипхол во Амстердам повторно се соочува со сериозни нарушувања во работењето, откако обилните снежни врнежи и силниот ветер предизвикаа големи проблеми низ цела Холандија.
Според информации од локалните медиуми, денеска дополнително се откажани 718 летови, а метеоролошките најави укажуваат дека во одредени делови од земјата можно е да наврнат уште до 10 сантиметри снег.
Од аеродромот Шипхол информираат дека и натаму се применуваат строги ограничувања во воздушниот сообраќај поради неповолните временски услови.
„Поради продолженото зимско време и силниот ветер, во среда ќе биде возможен само ограничен воздушен сообраќај до и од Шипхол. Се очекуваат нови откажувања на летови, главно на европските дестинации“, соопштија од аеродромот.
Поради откажувањата, илјадници патници останаа заглавени на аеродромот, додека авио-компаниите се обидуваат да ги ублажат последиците од временската непогода, која веќе неколку дена создава сериозни тешкотии во европскиот воздушен сообраќај.