Ролатите се прават лесно и многу убаво изгледаат на свечените трпези. Интересно е што посните ролати се многу лесни (не содржат јајца, млеко), побрзо се приготвуваат, а многу се вкусни.
Денес, ви го предлагаме овој сочен посен ролат со спанаќ и туна!
Состојки:
За кората
150 грама брашно
1 лажичка сол
1 лажичка прашок за печиво
200 грама спанаќ
200 милилитри кисела вода
2 лажици масло
За филот
1 конзерва туна
100 грама посен мајонез
малку оригано по вкус
Приготвување:
Варете го спанаќот 15-тина минути во солена вода, исцедете го и оставете го да се излади, па почнете да ја приготвувате кората.
Вклучете ја рерната да се грее на 200 степени. Во поголема чинија сипете брашно, додајте лажичка сол и лажичка прашок за печиво, па измешајте. Додајте го спанаќот, соединете, па постепено додавајте 200 милилитри кисела вода. На крај, додајте и 2 лажици масло, измешајте, па сипете ја смесата во поголем плех, подмачкан и обложен со хартија за печење.
Убаво распоредете ја смесата насекаде на хартијата и ставете ја да се пече 10 минути. Кората е тенка, па брзо ќе биде готова. Со хартијата завиткајте ја кората во ролат и замотајте го во влажна крпа. Тргнете го да се лади, а за тоа време пригответе го филот.
Исцедете ја туната од вишокот масло, па измешајте ја со посен мајонез и малку оригано. Одмотајте ја кората, внимателно одвојте ја од хартијата и премачкајте ја со фил, но внимавајте да не одите до рабовите, за да не ви истече филот. Повторно замотајте ја во влажна крпа и ставете ја во фрижидер барем три часа, за состојки убаво да се поврзат.
Исечете го изладениот ролат на кругови и послужете го.
Добар апетит!
