Денес претседателот на Собранието на Република Северна Македонија, Африм Гаши, оствари средба со претседателот на Врховната ревизорска институција на Чешка, Мирослав Кала. На средбата присуствуваше и Максим Ацевски, главен ревизор во Државниот завод за ревизија.
Претседателот Гаши изрази задоволство од средбата и ја подвлече одличната соработка на Државниот завод за ревизија и Собранието на Република Северна Македонија.
Гаши ја истакна одличната соработка со ДЗР во текот на мандатот на Ацевски. Претседателот нагласи дека Собранието секогаш е отворено за соработка со ДЗР и дека денешнава средба со Врховната ревизорска институција на Чешка е во насока на изнаоѓање нови модуси и сфери за проширување на соработката и меѓу двата завода и со Собранието. Гаши истана и дека меѓународните средби меѓу претставници од различни нивоа на државно управување се темел за приближување на граѓаните и унапредување на меѓудржавната соработка во сите сфери.
Кала се заблагодари за честа и средбата со претседателот на Собранието и истакна дека и неговиот впечаток е дека ДЗР работи професионално, транспарентно и одговорно во сферите на трошење на јавните средства и ја повтори одличната соработка меѓу овие две институции, која во текот на неговата посета е дополнително унапредена преку конструктивни дебати и
сфери за потенцијално проширување на соработка. Подвлече дека Чешка го поддржува евро – интегративниот пат на Северна Македонија во сите сфери и дека како институција остануваат отворени за секоја иницијатива и соработка со Собранието и ДЗР и во иднина.
Соговорниците се согласија дека блиската и непосредна комуникација меѓу институциите ќе продолжи преку службите и се заложија за остварување на средби во насока на размена на знаење, искуства и обуки во сферата на транспарентно и отчетно трошење на јавни средства и
разгледување на финални ревизорски извештаи од страна на парламентите.