Извршниот комитет и Централниот одбор на СДСМ закажаа седници на кои ќе ги разгледуваат барањата на ВМРО-ДПМНЕ за поддршка на уставните измени кои вчера лидерот Христијан Мицкоски ги изнесе на средбата со премиерот Димитар Ковачевски.
Портпаролката на СДСМ, Богданка Кузеска на прес-конференција потврди дека Ковачевски ќе ги свика партиските тела.
„По вчерашната сдредба имаме нови околности на политичката сцена и токму тие нови околности се повод за свикување на Извршниот и на Централниот одбор а секако дека тема ќе бидат начинот и формата со која што понатаму ќе продолжат преговорите со ВМРО-ДПМНЕ“, рече Кузеска.
На вчерашната лидерска средба ВМРО-ДПМНЕ најави дека ќе поддржи уставни измени ако по гласањето биде формирана широка влада во која нема да биде ДУИ, како и стапување во сила на измените во моментот кога Македонија ќе стане дел од ЕУ.