Силно невреме попладнево зафати повеќе делови од Македонија, а според најновите информации од Управата за хидрометеоролошки работи (УХМР), на повеќе локации се регистрирани поројни дождови, грмежи, засилен ветер и појава на град.
Според радарските мерења, најинтензивните атмосферски процеси се забележани во Овче Поле, каде што има силен пороен дожд, грмежи, силен ветер и град. Нестабилната облачна маса се движи од исток кон запад и се очекува да ја зафати Свети Николе и околината.
Поинтензивна нестабилност има и источно од Велес, како и во околината на Градско, каде што освен обилни врнежи се регистрира и појава на град.
Од УХМР информираат дека нестабилно време има и во Скопската Котлина, каде што во делови од градот има пороен дожд, грмежи, засилен ветер, а локално е можна и појава на град.
Невремето зафати и Полошкиот Регион, каде што на повеќе места се регистрирани интензивни врнежи и град, како и Преспанскиот Регион, западните планински предели и околината на Демир Хисар.
Појава на град е забележана и во околината на Радовиш, додека силни врнежи има североисточно од Кичево, каде што нестабилноста е проследена со засилен ветер и грмежи.
Од УХМР апелираат граѓаните да бидат внимателни, бидејќи нестабилното време продолжува и во текот на попладневните часови, а локално се можни поинтензивни временски непогоди со град и силни налети на ветер.