Владата денеска го усвои предлогот за разрешување на Љупчо Коцевски, со што постапката – која беше ставена во мирување за време на изборниот период – продолжува согласно законските процедури.
Портпаролката на Владата, Марија Митева, на прес-конференција информираше дека причините за ваквата одлука се веќе јавно познати и претходно образложени.
„На владина седница усвоен е предлогот за разрешување на Љупчо Коцевски, со што ја продолжуваме постапката која согласно законските ограничувања беше привремено стопирана за време на изборниот период“, вели Митева.
Таа додава дека оваа одлука е поради направени крупни професионални грешки при раководењето со јавното обвинителсто што доведува до нарушување на ефикасноста и фукционалноста на ЈО.
„Неовластено изнесување на информации и податоци за судски предмети со што ја повредил обврската за заштита на тајноста на постапката согласно закон. Нарушување на угледот на ЈО и неговиот личен углед, непостапувајќи согласно обврските кои што се предвидени во Уставот, законите и меѓународните договори ратификувани согласно уставот“, изјави Митева.
Од Владата најавуваат дека по усвојувањето на предлогот ќе следуваат понатамошните институционални чекори за финализирање на постапката.