Денеска ќе бидат испратени покани до сите претседатели на парламентарните политички партии, како и до претседателот на Собранието за лидерска средба во понеделник (4 декември).
Ваква најава даде премиерот Димитар Ковачевски вчера на прес конференција со потпретседателот на ЕК и висок претставник на ЕУ за надворешна политика и безбедност Жозеп Борел.
„Членството во ЕУ е нашата цел и ние немаме друга алтернатива. Дали ќе бидеме таму набрзо зависи само од нас, и тоа зависи од сите нас, односно од сите политички партии и политички чинители во оваа земја кои имаат одговорност пред народот да испорачаат резултати на патот кон ЕУ, без изговори“, рече Ковачевски.
Евроинтеграцијата, редовните претседателски и парламентарни избори, како и измените на Изборниот законик согласно препораките на ОБСЕ/ОДИХР, се очекува да бидат темите на лидерската средба која Ковачевски ќе ја закаже за понеделник.