Во Скопје денеска започнува вакцинацијата против грип. Министерството за здравство оваа година обезбеди 10.000 дози вакцини повеќе од лани, па вкупниот број на достапни дози сега изнесува 70.000.
Половината од тие дози веќе се „резервирани“ односно за нив веќе се пријавиле граѓани кои се дел од ризичните групи и сакаат да ги примат. Бесплатната вакцина против грип им следува на неколку категории граѓани кои се пријавија на апликациите обезбедени од Министерството.
Станува збор за хронично болни, бремени жени, лица повозрасни од 65 години, здравствени работници, деца на возраст од 6 месеци до 5 години и лица во установи за социјална заштита.
Дел од граѓаните веќе добиваат смс пораки со потврда дека нивната апликација за бесплатна вакцина против грип е примена и се насочуваат на вакциналните пунктови во точно одреден термин.
Вакцинацијата ќе се спроведува на 36 локации низ целата земја. До сега 33 илјади граѓани се пријавиле преку интернет-страницата вакцинација.мк. Од Комисијата за заразни болести, потсетуваат дека вакцинацијата е најдобар начин за заштита од тешки форми на грип.
Во Скопје, вакцинацијата ќе се одвива во Центарот за јавно здравје и неколку поликлиники.