Во Венецуела е прогласена вонредна состојба откако два исклучително силни земјотреси во рок од само неколку секунди го затресоа главниот град Каракас. Според официјални податоци, првиот земјотрес бил со магнитуда 7,2, а вториот, уште поразорен, 7,5 степени по Рихтер.
Хотел на брегот во градот Макуто, во северната сојузна држава Ла Гуаира, се урна во потресите што во средата го погодија тоа подрачје. Поголемиот дел од главната зграда на хотелот „Едуардс“, за кој страниците за резервации наведуваат дека има осум катови и 106 соби, е претворен во урнатини, а на видеоснимки потврдени од Си-Ен-Ен се гледа дека стои само влезот во објектот.
Други снимки од истото подрачје прикажуваат голема штета на објекти долж крајбрежјето и пореметувања во сообраќајот, со урнати фасади и напукнати коловози.
Според Хорхе Родригес, претседател на Националното собрание на Венецуела, во сојузната држава Ла Гуаира се срушиле до 15 згради. Тој изјави за Си-Ен-Ен дека оваа сојузна држава е најтешко погодена од земјотресите.