Генералното собрание на Обединетите нации денес гласаше за замена на традиционалната карта на светот со таква што попрецизно ја одразува големината на Африка.
Резолуцијата „Прави ја картата“, спонзорирана од Того и поддржана од членовите на Африканската унија (АУ), беше усвоена со поддршка од 164 земји, при што САД беа само против, а шест земји беа воздржани, објавува Би-Би-Си.
Таканаречената карта на Меркатор, која е широко користена од 16 век, беше критикувана затоа што ги прикажува Африка и Гренланд како да имаат речиси иста површина, иако Африка е 14 пати поголема.
Картата е дизајнирана во 1569 година од фламанскиот картограф Герард Меркатор за да им помогне на европските истражувачи да се движат низ светот.
Искривувањето на неговата карта е резултат на фактот дека е невозможно прецизно да се претстави површината на земјината топка на дводимензионална карта.
Секогаш кога се црта карта на светот, мора да се направат компромиси, а картата на Меркатор ја прикажува закривеноста на Земјата, правејќи ги земјите поблиску до екваторот да изгледаат помали отколку што се, додека земјите поблиску до половите да изгледаат поголеми.
Во обид да го исправат ова, тим картографи создадоа карта во 2018 година, која беше усвоена во февруари од 54-те земји-членки на Африканската унија, тврдејќи дека таа „попрецизно ја претставува големината на континентите, а особено Африка“.
Пред денешното гласање, министерот за надворешни работи на Того, Роберт Дуси, рече дека „праведен свет започнува со праведна карта“.
„Картата никогаш не е неутрална. Таа ги обликува перцепциите, влијае на тоа како луѓето и континентите се разбираат во светот“, рече Дуси на брифинг во ОН.
Гласањето на Генералното собрание на ОН не е обврзувачко, но ќе доведе до промени на картите што ги користат институциите ширум светот.