Пред продолжувањето на дијалогот на високо ниво меѓу Белград и Приштина во Брисел, претседателот на Србија, Александар Вучиќ, синоќа се сретна со специјалниот пратеник на САД за Западен Балкан, Габриел Ескобар, јави српската национална ТВ РТС, цитирана од БТА. .
Дијалогот продолжува две недели по тензиите во Косово поради одлуката на Приштина за пререгистрација на автомобили и лични карти, која беше одложена за 1 септември по интервенцијата на САД и ЕУ.
По средбата со Ескобар, Вучиќ на Инстаграм напиша дека имале исклучително отворен разговор.Србија како сериозна и одговорна страна во дијалогот ќе продолжи да прави максимални напори за зачувување на мирот, стабилноста и напредокот на целиот регион , изјави Вучиќ. Посебно нагласив дека нашата земја искрено работи на намалување на тензијата што не ја предизвика, согласно конзистентната политика на барање компромисно решение исклучиво преку дијалог, за доброто на сите граѓани, напиша Вучиќ на Инстаграм.
Ескобар, од своја страна, посочи дека во дијалогот меѓу Белград и Приштина треба да се бараат заемно прифатливи решенија и дека Заедницата на српските општини треба да се формира во согласност со уставот на Косово и по примерот на европската практика. Габриел Ескобар потсети дека дијалогот е во рацете на Европската унија, а Белград и Приштина мора да најдат прифатливо решение за да се постигне долгорочна стабилност.
Вучиќ вчера разговараше и со специјалниот претставник на ЕУ за дијалогот меѓу Белград и Приштина, Мирослав Лајчак, како и со генералниот секретар на НАТО Јенс Столтенберг. Вучиќ истакна дека улогата на НАТО и КФОР во Косово е важна за Србија и е од клучна важност за одржување на мирот и стабилноста.
За денеска е закажана средба на Вучиќ со шефот на европската дипломатија Јосеп Борел и со специјалниот претставник на ЕУ за дијалог Мирослав Лајчак. Предвидена е и заедничка средба со премиерот на Косово, Албин Курти.