НАТО ги осудува нападите на Русија врз цивилни цели во Украина. Ова го изјави генералниот секретар на Алијансата, Јенс Столтенберг, цитиран од „Ројтерс“.
„Разговарав со министерот за надворешни работи Дмитро Кулеба и ги осудив ужасните и недискриминирачки напади на Русија врз цивилната инфраструктура во Украина“ , напиша тој на Твитер.
НАТО ќе продолжи да го поддржува храбриот украински народ во нивната борба против агресијата на Кремљ колку што е потребно, увери Столтенберг.
Претходно денеска Европската комисија ги осуди како „варварски“ руските ракетни напади врз Киев и други украински градови.
Шефот за надворешна политика на ЕУ, Жозеп Борел, рече дека руските акции „немаат место во 21 век“ .
Ова се варварски и кукавички напади насочени кон невини цивили на пат кон работа и училиште во утринскиот сообраќај, нагласи портпаролот на ЕК Петер Стано.
Експлозии имаше во центарот на украинската престолнина Киев, како и во градовите Лавов, Тернопил и Житомир во западниот дел на Украина, а исто така и во Днепро во централниот дел на земјата.
Според информациите на врховниот командант на украинските вооружени сили, Валериј Залужни, руската војска истрелала вкупно 75 проектили на украинска територија за време на масовниот ракетен напад.
Според податоците, во нападот досега се убиени најмалку 11 лица, а 64 се повредени.
По нападите, земјите од Г7 одлучија да одржат итен состанок.